Qəfil ölümlər: bu qidalardan imtina edin - Xəbərdarlıq

Son illər 40 yaşdan yuxarı şəxslərin gözlənilməz, qəfil ölümləri artıb. Bunun əsas səbəblərindən biri kimi isə oturaq həyat tərzi və qidalara diqqət edilməməsi göstərilir.
Axar.az xəbər verir ki, Rusiyalı alim, həkim-endokrinoloq Zuxra Pavlova 40 yaşdan yuxarı olan insanların qidalanmada nələrə xüsusi diqqət yetirmələri gərəkdiyini açıqlayıb.
Həkimin sözlərinə görə, xüsusilə bu yaşdan sonra pəhrizə diqqət edilməlidir, şəkər və ətdən istifadə azalmalıdır:
"Şəkər yüksək qlisemik indeksi olan qidalardan biridir. Beynin qocalmasını sürətləndirir, bədxassəli hüceyrələr üçün əla "yanacaq"dır. Şəkər birləşdirici toxumanın zülalını zədələyir, dərini, qan damarlarını, daxili orqanları qocaldır və kataraktaya səbəb olur".
O, şəkərli qazlı içkilər və şirələrdən, xəmirdən, yağlı desertlərdən imtina etməyi və mümkün qədər ağ çörək, kartof, makaron, düyü, dənli bitkilərdən az istifadə etməyi tövsiyə edib:
"40 yaşdan yuxarı insanların əksəriyyəti fiziki fəaliyyətini azaldır. Ona görə də istehlak edilmiş və sərf olunan kalorilərin balansını qorumaq üçün pəhriz lazımdır. Yaxud daha çox hərəkət edin ki, əlavə yağlar yığılmasın".
O, həmçinin qeyd edib ki, ət zülalını (xüsusilə qırmızı əti) həzm edən fermentlərin sayı yaş artdıqca azalır. Ondan tamamilə imtina etmək lazım deyil, lakin istifadəsini həftədə iki dəfəyə qədər azaltmaq lazımdır:
"Fəst-fuddan isə qəti imtina edilməlidir. Çünki fəst-fud gəncliyi və sağlamlığı "oğurlayır". İşlənmiş və qızardılmış qidalar, xüsusən də ət qaraciyərin, qan damarlarının və oynaqların iltihabına səbəb olur. Nəticədə dəri, maddələr mübadiləsi, piylənmə ilə bağlı problemlər yaranır".