Payız qripi zamanı nə etməli?

Hər mövsümdə qrip xəstəliyinə yoluxma halları olsa da payız-qış aylarında daha geniş formada yayılır. Hər mövsümdə isə xəstəlik özünü biruzə verir. Qrip virusları tənəffüs yollarının epitel hüceyrələrinə yüksək tropizmə malik olduğuna görə, əsasən tənəffüs yolları infeksiyalarını törədirlər.

Hər mövsüm isə xəstəliyin yeni mutasiyaya uğramış versiyası ilə tanış oluruq.

Doktorinfo.az xəbər verir ki, bu növ xəstəlik, insanlara hava damcı yolu ilə yoluxur. İnsan orqanizmi qrip virusuna qarşı çox həssas olur. Xəstə insan asqıran, öskürən, danışan zaman mikroblar qarşı tərəfə keçərək qarşıdakı insanı yoluxdura bilər. Hətta təmas, qida yolu ilə belə yoluxuculuğun olması mümkündür.

Bəs payız fəslində yayılan qrip xəstəliyi necə olur?

Qripin gizli dövrü orqanizmə daxil olan virusların sayından və immun sistemin vəziyyətindən asılı olaraq 1-4 gün davam edə bilər. Qripin əlamətləri xəstəliyin ilk günündə maksimum olur,1- 2 gün davam edir, sonrakı 5 gündə zəifləyir.

Payız qripinin əlamətləri:

Baş ağrısı

Burun axıntısı

Öskürək

Hərarət

Yorğunluq və s.
Hərarət adətən 3-5 gün davam edə bilər. Öskürək isə xəstənin vəziyyətindən asılı olaraq bir aya kimi davam edə bilər. Başqa xəstəliyi olanlar isə daha diqqətli olmalıdırlar. Belə insanlarda qrip daha da uzana bilər.

Bəzən bu əlamətlərlə yanaşı ishal, qusma halları da müşahidə edilə bilər.

Bəs bu zaman nə edilməlidir?

İmmun sistemin normal fəaliyyəti üçün vitamin C, mikroelementlərlə zəngin qidalarla qidalanmaq çox vacibdir. Çünki xəstəliklər zamanı immun sistemi vacib rol oynayır.

Böyüklərdə ağırlaşma mərhələsi varsa həkim göstərişi ilə əlavə immun dərmanları və yüksək dozada C vitamini yazılmalıdır.

Qidalanmağa xüsusi diqqət yetirilməlidir. Mövsümə uyğun meyvələrdən bolca istifadə edilməlidir. Xüsusilə də C vitamini ilə zəngin olan mandarin, portağal, kivi kimi meyvələr yeyilməlidir. Sulu yeməklər mədə həzminə kömək olaraq vəziyyətin yüngülləşməsinə gətirib çıxaracaq.

Dəniz suyun burun damlalarından isə tez-tez istfadə edilməlidir. Bu həm böyüklər, həm də uşaqlarda xəstəliyin yüngül keçməsinə şərait yaradacaq.