Hamiləlikdə Herpes virusu təhlükəlidir?

Hamiləlikdə yaşanılan problemlərdən biri dərinin müxtəlif nahiyələrində yaranan uçuqlar, səpkilərdir. Herpes simpleks olaraq bilinən bu problemə səbəb olan virus təmas yolu ilə hamiləyə yoluxduğu zaman diqqətli olmaq vacibdir.

Herpes nədir?

Hamiləlik vaxtında qadınlar bir çox problemlərlə qarşılaşa bilərlər. Bunlardan biri də herpesdir. Bu zaman dəridə içi su dolu ağrılı qabarcıqlar yaranır. Herpes illərlə heç bir fəsad, təhlükə törətmədən də yaşaya bilər. Ancaq bədən zəif düşən zaman aktivləşməsi mümkündür.
Virusun 8 tipi olsa da daha çox 3 formasına rastlanılır. Bunlardan ilki ağızda, burun və ətrafında görülən HSV 1-dir. Digər növü isə adətən genital nahiyədə yaranır. 3-cü forma isə sinir sinisteminə yerləşə bilən virusdur.

Necə ortaya çıxır?

Hamiləlik zamanı immunitet sistemi zəifləyə bilir. Bu ərəfədə yoluxma riski yüksək olur. Bundan əlavə düzgün qidalanmamaq, gigiyenaya diqqət etməmək kimi faktorlar da bu virusa yoluxdura bilər. Qrip kimi immuniteti daha da aşağı salan xəstəliklər də herpesə zəmin yaradır.
Qarındakı dölə təsir edirmi?

Vücuda yerləşən viruslar ölmədiyi üçün hamiləlik zamanı təhlükəli hesab olunur. Çünki bu, həm ana, həm də uşağa mənfi təsir göstərir. Dölün tələf olmasına, uşaqsalma hallarına, beyin zədələnməsinə yol aça bilər.

Virus necə inkişaf edir?

Virusa yoluxduqdan 2 -10 gün arasında uçuqlar, səpkilər yaranmağa başlayır. Ağız, burun və ətrafında yaranan səpkilər qırmızı rəngdə, qabarıq, ağrılı olur, yanma hissi verir. Daha çox böyüyür, bir müddət sonra qabıqlanaraq tökülür.

Vaginal nahiyədə yaranan səpkilər zamanı sidiyə gedilmə çox ağrılı prosesə çevrilə bilir. Çünki həssaslıq, yanma hissi verir. Bu səbəblə qadınlarda vaginal axıntı, şişkinliklər müşahidə edilə bilər. Bundan əlavə halsızlıq, yorğunluq kimi simprtomlar da müşahidə edilə bilər.

Dəqiq araşdırma olmasa da hamiləlik vaxtı virusun dölə mənfi təsir etdiyi düşünülür. Çünki təsirdən asılı olaraq bu, bəzi hamiləliyin yarıda qalmasına, dölün tələf olmasına yol aça bilər.
Ağız və burunda yaranan uçuqların uşağa keçmə ehtimalı olduqca azdır. Ancaq vaginal nahiyədə yaranan uçuqlar zamanı çox diqqətli olmaq lazımdır. Doğuş başladıqda isə virusun uşağa yoluxma ehtimalını nəzərə alaraq qeysəriyyə əməliyyatı təyin edilə bilər. Beləliklə uşağın doğuş kanalı vasitəsilə virusla təması riski azalır.
Necə qorunmalı?

Bu zaman antiviral dərmanlardan istifadə edilir. Burada məqsəd infeksiya riskini azaltmaqdır.

Gigiyenaya diqqət yetirmək lazımdır.

Hamiləlik zamanı immunitet sistemi mümkün qədər qorunmalı və gücləndirilməlidir.