Bağırsaq ağrısının səbəbləri

Bağırsaq ağrısı bir çox insanların ortaq problemidir. Bagirsaq sistemində baş verən pozğunluqlar adətən bağırsaq sindromu, xroniki enterit, kron, qeyri-spesifik xoralı kolit zamanı yaranır.

Doktorinfo.az məlumat verir ki, ağrının səbəbi laborator analizlər, ultrasəs, endoskopik və rentgenoloji üsullarla aşkar edilir.

Bagirsaq agrisinin sebebleri nelerdir?
Qıcıqlanmış bağırsaq sindrom - Bu zaman qarında müxtəlif ağrılar yaranır. Bunlar adətən dartılan, spastik xarakterli olur. Gərginlik zamanı bağırsaq ağrısı güclənir. Tutmaşəkilli, şiddətli ağrılar sol nahiyədə daha çox baş verir.

Qadınlarda menstruasiyadan öncə ağrı artır. Xəstələrdə gəyirmə, ürəkbulanma və köp yaranır.

Kron xəstəliyi - Nazik bağırsağın terminal hissələrinin zədələnməsi ilə bağlıdır. Qarında yüngül ağrılar, vəziyyət kəskinləşdikdə isə şiddətli ağrı və nəcisdə qan müşahidə olunur. İştahsızlıq, halsızlıq, ishal, yorğunluq kimi əlamətlərlə özünü göstərir.

Bağırsaq infeksiyaları - Nazik bağırsağın zədələnmələrində ağrı göbək ətrafında daha çox yaranır. Yoğun bağırsaqda da problem yarandıqda ağrı qarnın sol hissəsində əmələ gəlir. Bağırsaq ağrısı kəskin və tutmaşəkilli olur.
Xroniki enterit – Göbək ətrafında, qarnın yan tərəflərində küt və yaxud sızıltı ağrılar baş verə bilər. Qidalanma pozğunluqları, spirtli içkilər ağrını daha da kəskin vəziyyətə gətirə bilər. Qaz və nəcis ifrazından sonra narahatlıqlar azalır. Enterit üçün xroniki ishal əsas tipik əlamət hesab edilir. Onların tərkibində həzm olunmamış qida qalıqlarına rast gəlinir.

Bağırsağın törəmələri - İlkin mərhələlərdə gizli gedir. Ölçülər böyüdükcə ağrı da kəskinləşir. Göbək ətrafında və yaxud qarnın yan hissəsində güclü spazmlar baş verir.
Qidalanma pozğunluqları və ya digər növ faktorlarla bağlı olmur.

Düz bağırsaq zədələndikdə xəstələr defekasiya zamanı bağırsağın tam boşalmamağını hiss edirlər. Əlamətlər isə digər problemlərlə bənzər olur.

Disbakterioz – Qarın hissəsində spazm və sancılar baş verir. Sol tərəfdə ağrı daha kəskin olur. İshal, qarında ağırlıq, qurultu yarana bilər. Nəcis sulu, bol miqdarda və yaşıl rəngdə olur. Disbakterioza antibiotiklərin qəbulu, xroniki qastroenteroloji xəstəliklər və immun pozğunluqlar zamanı təyin edilə bilir.