Halluks Rigidus xəstəliyi nədir?

Bəzi insanlar ayaq baş barmağında yaranan ağrı, şişlikdən şikayətlənirlər. Ancaq bunun hansısa xəstəliyin əlaməti olduğundan xəbərsiz olurlar. Halluks Rigidus, ayaq baş barmağının kökündə mövcud olan oynaq üzərində meydana gələn və adətən 25-65 yaş arası şəxslərdə müşahisə edilən ayaq xəstəliyidir. Eyni zamanda sərt ayaq baş barmağı olaraq da bilinir. Oynaqlarda yaranan sərtlik yeriməkdə çətinlik yaradır. Bəzən isə şiddətli ağrı verərək hərəkət etməyə maneə olur. Oynaqda olan qığırdağın zədələnməsi nəticəsində meydana gələn yırtılma ilə sümüklər bir-birinə sürtülür. Bu hal artdıqca sümük çıxıntısına səbəb ola bilər. Meydana gələn böyümə sayəsində baş barmağın funksiyası məhdudlaşır və gedərək həmin barmaq bükülməyəcək hala gəlir.

Halluks Rigidus nədən olur?

Düz daban probleminə sahib olan xəstələrdə daha çox müşahidə edilir. Həmçinin ayağın ucunda yerimək, yalnış ayaqqabı, revmatizm xəstəlikləri problemin yaranmasına yol açır. Bundan başqa revmatoid artrit və gut xəstələrində müşahidə edilir.

Əlamətləri nələrdir?

Əksər insanlarda simptomların başlanğıcı barmaq ağrısı və barmağın üzərində şişlik formasında meydana gəlir.
Digər əlamət isə:

Qaçmaqda çətinlik

Çətin yerimək

Ayaqda ağrı

Baş barmağı bükə bilməmək

Oynaq problemləri

Barmaqda qızarıqlıq və s.
Ayaq baş barmağında və digər barmaqlarda yaranan şişliklər, baş barmaq sümüyü üzərində meydana gələn böyümə, ayaqqabı geyimində də xəstəyə narahatçılıq verir.
Bu problem üçün travmatoloq-ortopedə müraciət edə bilərsiniz.

Müayinəyə daxildir:

Barmaq hərəkətlərinin yoxlanışı

Xəstədə yarana ağrı şiddətinin öyrənilməsi

Qığırdaq quruluşda olan deformasiyaların müayinəsi

Ayağın zərbəyə məruz qalıb-qalmadığı

Bunlarla yanaşı bənzər problemləri ayırd etmək üçün rentgen istənilir. Həmçinin pasiyentdə başqa xəstəliyin olub-olmaması vacibdir. Bunların hər biri tərtib ediləcək müalicə sxeminə təsir göstərir.
Rentgen müayinəsində xüsusilə xəstənin yerə basdığı pozisiyaya ehtiyac ola bilər. Çünki bu zaman oynaqlar, qığırdaqların qalınlığı, yaranan sümük çıxıntıları araşdırılır.
Müalicəsi vəziyyətə uyğun təyin edilir. Buna müxtəlif kremlərdən istifadə, fizioterapiyalar, massaj, cərrahi müdaxilə aiddir. Bəzən ağrılar üçün ağrıkəsicilər, şiş üçün buz tətbiqi təyin edilə bilər. Bəzən isə sadəcə cərrahi müdaxilə mütləq hala gəlir. Həmçinin pasiyentə dincəlmək, daban hissəsi sərt və nisbətən qalın olan ayaqqabı geymək tövsiyə edilə bilər.
Hərəkət funksiyalarının itkisi və əlavə olaraq sümük çıxıntısı mövcuddursa bu zaman xəstələrə uca doğru dar və az dərinliyə sahib ayaqqabılardan qaçınmaqları tövsiyə edilir. Görülən tədbirlər fayda vermədiyi zaman cərrahi müdaxilə seçim ola bilər. Cərrahi əməliyyat üçün xəstənin yaşı, xəstəliyin mərhələrsi nəzərə alınır.
Əgər zamanında müdaxilə edilməsə ağrılar şiddətini artıra, yerimək isə imkansızlaşa bilər.