Vücudda yaranan qırmızı xal təhlükəlidir?

Qırmızı xal, vücudda hər nahiyədə yarana bilən dəri problemidir. Rəngi bənövşəyi, qırmızı rəngdə olduğu üçün qırmızı qal adlanır. Adətən 30 yaşdan sonra daha çox görülür. Qırmızı xalın içərisindəki kiçik qan damarlarının toplaşmaları ona qırmızı görüntünü verir. Digər xallardan fərqli olaraq damarlardan yaranan xal növü hesab edilir. Bu səbəbdən "damar xalı" da deyilir. Bəzən sərt formalı görüntüsü olsa da ani zərbə nəticəsində qanaya, zədələnə bilər.

Bu tip dəri prosesi əgər tez-tez qanamırsa və ya ölçüsü, forması, rəngi dəyişmirsə adətən problem yaratmır. Əgər qanaxma və ya görüntüdə dəyişiklik varsa həkimlə məsləhətləşməkdə fayda vardır. Bunlar dəri xərçənginin əlaməti ola bilər.
Qırmızı xalın yaranma səbəbi nədir?

Qırmızı xalın yaranmasının tam səbəbi bilinmir, ancaq bəzi insanlarda bunun genetik faktordan qaynaqlandığı deyilir. Bundan başqa hamiləlik, kimyəvi maddələrə məruz qalma, bəzi xəstəliklər buna yol aça bilər. Bəzi mənbələr xalın yaranmasını mədə-bağırsaq, qaraciyər, tiroid hormonu ilə əlaqələndirsə də bu, təsdiqini tapmayıb. Bu səbəbdən xüsusi narahatçılığa ehtiyac yoxdur.
Qırmızı xal yaşla bağlıdır. Əksər insanlarda məhz 30 yaşdan sonra meydana çıxır. Ölçüləri isə yaşla əlaqəli olaraq arta bilər. Bunu isə aparılan araşdırmalar təsdiq edib.

Formaları necə olur?
Qırmızı xal adətən parlaq qırmızı rəngdə, yumru və ya oval formalı kiçik xal növüdür. Bəziləri yumşaq və dərinizdə normal formada görünə bilər, bəziləri isə daha çıxıntılı olur. Qollarda, ayaqlarda, çiyinlərdə daha çox müşahidə edilir. Əgər həmin nahiyəni qaşısanız, hansısa zərbə nəticəsində kəsilərsə və ya ovalanarsa qanaya bilər.
Həmçinin hörümçəyə bənzər formada da qırmızı xalı görə bilərsiniz. Bu zaman mərkəzdə kiçik qırmızı xal ətrafındakı damarlar isə hörümcək toruna bənzəyən formada olur. Bunlar adətən üz nahiyəsində olur.
Necə müalicə edilir?
Əksər zaman müalicəyə ehtiyac qalmır, ancaq kosmetik cəhətdən pis görüntü yarada biləcəyi üçün alınması istənilə bilər.
Bu, cərrahi, lazer, yandırılma yolu ilə aradan qaldırılır. Kəsilmə üsulu ilə də xallardan xilas olunmaq mümkündür. Bu prosedurla xal dərinin üst qismindən götürülür.

Bəs götürülən xallar yenidən yaranırmı?

Əgər götürülmə proseduru doğru şəkildə həyata keçirilibsə yenidən qayıtma şansı yoxdur. Başqa nahiyələrdə yaranmağı, artması mümkündür.
Qeyd edək ki, kiçik toxunuşlarla belə xalları götürmək mümkündür, ancaq başqa nahiyədə yaranmasının qarşısını almaq mümkün deyil.
Qırmızı xallar xərçəngə çevrilirmi?

Əsla xərçəngləşməyən xal qrupundandır. Uzunmüddət qalsa da, böyüsə də xərçəngə çevrilmə ehtimalı yoxdur. Buna baxmayaraq böyük orqanların yanındakı və ya sürətlə böyüyən hemangiomalar həyati təhlükə yarada bilər. Ancaq özlüyündə və ya təbii yollarla kiçilmə ehtimalı yoxdur.

Digər üsullarla götürməyə çalışarkən diqqətli olmaq lazımdır. Çünki qanayarsa təhlükəli vəziyyətə çevrilmək ehtimalı ola bilər.