Uşaqlara qoyulan yanlış diaqnozlar - Pediatrdan açıqlama

Müasir zamanda qatqılı qidalar, geni dəyişilmiş meyvələrdən istifadə sağlamlığa da təsirsiz ötüşmür. Bu, xüsusilə də uşaqlara təsir göstərir. Bəzi xəstəliklərin diaqnozu isə yanlış qoyulur.

Doktorinfo.az xəbər verir ki, pediatr-neonatoloq Altay Abdullaoğlu ölkədə körpələrə ən çox yanlış qoyulan diaqnozlardan bəhs edib.

Bunlar aşağıdakılardır:

1. Kəllədaxili təzyiq

2. Timus

3. Hipoksiya (oksigen çatışmazlığı)

4. Nevroloji uşaq

A. Abdullaoğlunun sözlərinə görə, ölkədə bu xəstəliklər səbəbiylə müalicələr alan yetərli sayda kifayət qədər körpə var:

"Azərbaycanda olduğum müddətdə mənə bu diaqnozla müraciət edən xəstələrin 99 %-nin tamamilə sağlam olduğunu müşahidə etmişəm. Çox vaxt körpələrdə olan bəzi normal əlamətlər xəstəlik olaraq qəbul edilir və buna uyğun olaraq kurs müalicələrə başlanılır. Bu əlamətlərdən ən çox rastladıqlarımız körpələrin ağız ətrafında müşahidə olunan göyərmələr, ağlayanda çənənin əsməsi, gecələr səbəbsiz bir şəkildə ağlamaqlar, dilin bayıra çıxarılmasıdır".
A.Abdullaoğlu, bu əlamətlərin xəstəlik əlaməti olmadığını, normal fizioloji hal olduğunu vurğulayıb.

"Əgər körpənin müayinəsində digər əlamətlər görünməzsə bu əlamətlər müstəqil bir surətdə hər hansı bir xəstəliyin əlaməti hesab olunmur və tamamilə normal bir haldır. Bu əlamətlər zamanla öz-özünə keçib gedəcəkdir. Ona görə hər kəsə tövsiyəmiz uşaqlarına qarşı daha diqqətli olmaları və yersiz yerə körpələri kurs müalicələrə məruz qoymamaqlarıdır",-deyə pediatr nəzərə çatdırıb.