Ekzema dəri xəstəliyi nədir?

Ekzema, digər adı ilə desək atopik dermatit, müxtəlif səbəblərlə ortaya çıxa bilən və qızarıqlıq, qaşıntı, şişlik kimi əlamətlərlə özünü göstərən dəri xəstəliyidir. Cəmiyyətdə çox rast gəlinən dəri xəstəliklərindən biridir. Səbəbi dəqiq bilinməsə də stresin daha çox zəmin yaratdığı bildirilir. Əlamətləri növünə görə fərqlilik göstərir.

Əlamətləri:

Ən əsas əlaməti qızarıqlıq və qaşıntıdır. Quruluqla əlaqəli olaraq səpki, çatlayan dəri görüntüsü müşahidə edilə bilər. Bu səbəblə dərini yaxşı nəmləndirmək əsas şərtlərdən biridir. Adətən əl və ayaqlarda müşahidə edilir. Buna baxmayaraq vücudun başqa nahiyələrində də yarana bilər.

Səbəbləri:

Səbəbləri arasında genetik faktorlar və dərinin həssas olduğu allergik maddələrə məruz qalmasını misal çəkə bilərik. Tozlu məkanlarda işləməyə məruz qalan insanlarda bu problem daha çox yaşanır.
İnsanlar buna diqqət göstərməlidirlər. Çünki mütəmadi bu maddələrə məruz qalmaq xəstəliyi daha da kəskinləşdirə bilər.

Simptomları:

Quru dəri

Dəri qalınlaşması

Dəridə su toplanması

Dəri dəyişiklikləri

Həssaslıq

Qaşınma əsnasında yaranan yaralanmalar

Qızartı

Qabarcıqlar

İltihab
Bir çox növləri mövcuddur. Əl, atopik, seboreik, kontakt və s. növ ekzemalar xüsusiyyətlərinə görə fərqlidirlər.

Əl ekzeması – Dəri üçün həssaslıq yaradan maddələrə toxunma nəticəsində meydana gələ bilər. Adətən təmizlik işi görənlər, kimyəvi maddələrlə təmas edən əllərdə bu növ daha çox rast gəlinir.

Atopik ekzema – Adətən uşaqlıq dövründən meydana çıxa bilər.

Seboreik – Səbəbi tam bilinməsə də adətən dərinin yağlı olduğu nahiyələrdə ortaya çıxar və qızarıqlıq, qabıqlanmağa səbəb olur. Qış və yaz fəsillərində artış göstərər.

Kontakt ekzema – Dərinin qoruyucu yağ təbəqəsinin yaranmasına icazə verməyən kimyəvi məhsullarla təmas zamanı yaranır. Akut və xronik ola bilər.

Müalicəsi:

Mümkün və asan müalicəyə tabe olan problemdir. Ancaq müalicəni gecikdirməmək vacibdir. Çünki müalicə olunmadığı təqdirdə dəri daha da zədələnə bilər, buna bağlı olaraq isə bakteriyalar dəriyə düşüb daha da pis problem halına sala bilər.
İlk olaraq onu yaradan, səbəb olan faktor aşkar edilir. Daha sonra dərinin onunla təması məhdudlaşdırılır. Bununla yanaşı kremlər, dərman preparatları yazıla bilər.
Dərinin nəmli qalması üçün kremlərdən, lasyonlardan istifadə bir müddətlik deyil, daimi olmalıdır.