Şirvanda elmi-praktik konfrans keçirildi - Video

Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB), Milli Onkologiya Mərkəzi (MOM) və "Regional İnkişaf" İctimai Birliyinin (RİİB) birgə təşkilatçılığı ilə "Süd vəzisi xərçəngi ilə mübarizə ayı" çərçivəsində regionlarda həyata keçirilən profilaktik müayinə və maarifləndirmə tədbirləri Şirvan şəhərində davam etdirilib.
Axar.az xəbər verir ki, layihə üzrə oktyabrın 16-də "Süd vəzisi xəstəliklərinin müasir müayinə və müalicəsi" mövzusunda Şirvan şəhərində elmi-praktik konfrans təşkil olunub. Konfransda Milli Onkologiya Mərkəzinin mütəxəssisləri və Şirvan şəhəri, Hacıqabul, Salyan, Sabirabad, Saatlı rayonlarında çalışan onkoloq, ginekoloq, terapevt, uroloq və cərrahlar iştirak edib.
Tədbirin açılışında Milli Onkologiya Mərkəzi, "Regional İnkişaf" İctimai Birliyi və Tibbi Ərazi Bölmələrini İdarəetmə Birliyinin nümayəndələri çıxış edərək, ölkəmizdə əhalinin sağlamlığının qorunması, onlara göstərilən tibbi xidmətlərin keyfiyyətinin artırılması istiqamətində dövlət tərəfindən görülən işlərdən, əldə olunan nəticələrdən, o cümlədən onkoloji xəstəliklərlə mübarizə və bu mübarizədə aparılan maarifləndirmə tədbirlərinin əhəmiyyətindən danışıblar. Bildirilib ki, onkoloji xəstəliklərin erkən diaqnostikası və bu sahədə vətəndaşların məlumatlı olması xəstənin vaxtında müalicəyə cəlb edilməsi, yarana biləcək fəsadların qarşısının alınması baxımından faydalıdır. Regionlarda davamlı olaraq aparılan onkoloji müayinə və maarifləndirmə aksiyaları da bu məqsədə xidmət edir.
Daha sonra mütəxəssislərin "Süd vəzisi xəstəliklərinə müasir yanaşma", "Süd vəzisi xərçənginin onkoplastik və rekonstruktiv cərrahiyyəsi", "Trofoblastik xəstəliklər", "Süd vəzisi xərçənginin müasir müalicə prinsipləri" və digər mövzularda maraqlı təqdimat və məruzələri dinlənilib. Tədbirin yekununda iştirakçılara sertifikatlar təqdim olunub.
Qeyd edək ki, layihə çərçivəsində həmçinin oktyabrın 15-də Şirvan şəhərində "Hər kəs bilsin, həyat davam etsin!" devizi altında Milli Onkologiya Mərkəzinin həkimləri tərəfindən qadınlar arasında süd vəzisi xəstəlikləri üzrə profilaktik müayinələr aparılıb. Ümumilikdə 155-dən çox sakini əhatə edən müayinələrin nəticələri əsasında xəstəlik riski olanlar daha geniş diapazonlu müayinə üçün Milli Onkologiya Mərkəzinə dəvət edilmiş, digər patologiya aşkar olunan xəstələr ixtisaslaşmış tibb müəssisələrinə yönləndirilmiş, eyni zamanda qadınlarla profilaktik söhbət aparılmış, yerində məsləhətlər verilib.