Bir çoxlarının problemi olan siyatik ağrı nədir?

Siyatik sinir bədənin ən uzun siniri hesab edilir. Bel sümüyünün alt qismindən başlayır və ayağa qədər uzanır. Ayağın hiss və hərəkət funksiyalarını nizamlayır. Bu sinirin zədələnməsi ciddi ağrılara səbəb olur. Müalicə olunmazsa bir müddət sonra ağrılar şiddətlənə bilər. Ayaqdakı ağrı hissi müalicə edilə bilər.
Siyatik ağrısı, 20-60 yaş arasında yaranıb, idman etməyən və ya ağır işlərdə çalışan qadın və kişilərdə çox rast gəlinir.

Əlamətləri

Ən çox yayılmış simptom bel və arxa nahiyədən ayağa uzanan ağrıdır. Qalxma və oturma pozisiyalarında şəxsə narahatçılıq hissi verə bilər.
Bundan əlavə aşağıdakı əlamətlər mövcud olur:

Ayağın alt qismində və ayaqda ağrılar, qarışqa dişləməsi hissi

Ayaq barmaqlarında və topuq nahiyəsində iynə batma hissi

Siyatik sinirin olduğu nahiyələrdəki ağrıdan qaynaqlanan hissizlik və hərəkət çətinliyi

Hərəkət zamanı artan ağrı

İrəliləyən siyatik xəstələrində hiss və hərəkət itkisi.
Səbəbləri

Onurğada mövcud olan sümüklərin fərqli səbəblərdən siyatik sinirə təzyiq etməsi ilə ortaya çıxır. Həmçinin hərəkətsiz insanlarda da bu tip ağrılar müşahidə edilə bilər. Uzunmüddət oturmaq, iş görməmək də ağrıları yarada bilər.

Piylənmə - Onurğaya düşən normadan artıq yük vücudun hərəkətini çətinləşdirir. Bu da sinirlərin zədələnməsi ilə nəticələnə bilər.

Yaş – İrəliləyən yaşlarda sümük və sümük ətrafındakı toxumalarda görülən zəiflik siyatik ağrıya səbəb ola bilər.

Diabet – Şəkər xəstəsi olan insanların sinirləri daha tez zədələnə bilər.

Travma – Bir yerdən düşmək bu növ sinirlərin zədələnməsi ilə nəticələnə bilər.

Diaqnoz:

Yeni başlayan siyatik ağrı bir müddət sonra özlüyündən keçə bilər. Bununla yanaşı uzun davam edən, şiddətli ağrılardan şikayətlənən xəstələr ətrafı müayinə edilirlər. Rentgen, MRT,Tomoqrafiya istənilə bilər.
Müalicə

Ağrıların şiddəti insandan-insana görə fərqlənir. Bu da müalicəyə istiqamət verir. Fizioterapiya belə ağrılar zamanı effektiv təsirə malikdir. Duruşu və əzələləri bərpa etmək üçün fizioterapevtlər tərəfindən müəyyən hərəkətlər təyin olunur.

Bəs siyatik xəstəliyi üçün kimə müraciət edilməlidir?

İlk olaraq travmatoloq-ortoped müayinəsi vacibdir. Edilən analizlərdən sonra həkim sizi neyrocərraha yönləndirə bilər.