Hepatit C xəstəliyi nədir?

Hepatit C, bu virusun səbəb olduğu, qanla yoluxa bilən qaraciyər xəstəliyidir.
Dünya üzrə 70 milyon insanın mübarizə apardığı sağlamlıq problemidir. Çünki qaraciyərdə ciddi fəsadlar törədə bilər. Qaraciyər çatışmazlığına səbəb olması səbəbiylə vacib xəstəlik hesab edilən Hepatit C müasir zamanda müalicəyə tabe olan xəstəliklər sırasına daxil olub.

İnsan necə yoluxur?

İnfeksiya riskləri cəhətdən diqqətli düşünülməmiş qan nəqli, üzərində hepatit C viruslu qan olan əşyaların digər insanlarla paylaşımı yoluxma ehtimalını artırır. Bura daxildir: diş fırçası, üz təmizləmə aləti və ya dırnaq qayçısı...
Doğru formada sterilizə edilməyən diş müalicə alətləri, steril olmayan kosmetika alətləri, damar üçün olan iynələrin birdən çox insanlar tərəfindən istifadəsi də birbaşa yoluxma faktorudur.

Hepatit C daşıyıcısı olan hamilələrdə virusun uşağa yoluxma riski 10 faizdən aşağıdır. Yoluxmanın hansı zamanda baş verəcəyinə dair dəqiq təsdiqini tapmış elmi araşdırma yoxdur.
Bu xəstəliyin daşıyıcısı olan ana uşağa süd verə bilər. Ancaq süd verərkən həmin nahiyənin təmiz olduğuna, qanaxmanın baş vermədiyinə əmin olmalıdır. Əks halda yaralanan, çatlayan və qan gələn sinədən uşağın süd içməsi risklidir.

Əlamətləri nələrdir?

Akut və xroniki ola bilər.
Akut xəstəlik aşağıdakı əlamətlərlə özünü göstərir:

Qripə bənzəyən simptomlar

Əzələ ağrıları, yüksək qızdırma

Qarın ağrısı

İştahsızlıq

Bulantı

Nadirən yaranan sarılıq
Akut xəstəlik 6 aydan qısa davam etməklə bərabər, virus vücuddan təmizlənə bilər və ya akut qaraciyər çatışmazlığı inkişaf edə bilər.
Xroniki hal varsa bu zaman ilk əlamətlər yüngül yorğunluqla başlaya bilər. Bu əlamətlərdən sonra virus sirroz və daha sonra qaraciyər çatışmazlığına yol aça bilər.

Diaqnozu necə qoyulur?

Adətən 2 qan testindən istifadə edilərək diaqnoz qoyula bilər. Antikor və PCR testi vacibdir.
Bununla yanaşı qan testləri də xəstəliyin irəliləməsi ilə bağlı dəqiq məlumatları əldə etməyə imkan verir.

Müalicə üsulları:

Dərman preparatları ilə müalicəyə üstünlük verilir. Müasir zamanda Hepatit C artıq tamamilə sağalan xəstəlik siyahısına daxil olub. Mütəmadi həkim nəzarətində olaraq müalicə davam etdirilməlidir.

Hepatit C virusuna qarşı hələ təsdiqini tapmış peyvənd yoxdur. Bu xəstəliyə qarşı cəmiyyət maarifləndirilməlidir. Xüsusilə xanımlar getdikləri salonlarda istifadə edilən alətlərin steril olduğuna diqqət göstərməlidirlər.