Günəş allergiyası nədir?

Bir çox insan günəş allergiyasından əziyyət çəkir. Belə ki, bir sıra insanlarda xüsusi müdaxiləyə ehtiyac olmur, özlüyündən keçir, digər bəzi insanlarda isə şiddətli qızarıqlıqlar yarana bilər ki, bunun üçün müalicəyə ehtiyac olur.

Günəş allergiyası nədən olur?

Günəş allergiyaları, günəşə məruz qalan dəridə meydana gələn dəyişikliklərlə şiddətlənə bilir. Vücudun bu reaksiyasının səbəbi dəqiq bilinmir. İmmunitet sistemi günəşdən təsirlənən dərinin bəzi hüceyrələrini "yad" olaraq görür və vücud buna qarşı özünümüdafiə mexanizminə keçir. Bu isə qızarıqlıq, kiçik qabarcıqlar və ya nadirən dəri səpkiləri formasında özünü göstərir. Günəş allergiyası adətən həssas dəriyə məxsus insanlarda görülür və bəzi zamanlarda isə günəşə yalnız bir neçə dəqiqə məruz qalmaq kifayət edə bilir.

Günəş allergiyasının əlamətləri nələrdir?

Günəşə məruz qaldıqdan bir neçə dəqiqə, saat və ya gün sonra meydana çıxa bilər. Məruz qalan dəri səthi miqdarına, günəşdə qalma müddətinə, işığın çoxluğuna və allergiyanın növü ilə bağlı olaraq simptomlar yüngül ilə şiddətli arasında dəyişiklik göstərir. Səpkilər adətən günəş işığına məruz qalan nahiyələrdə görülür. Bəzi anlarda isə fərqli nahiyələrdə müşahidə edilə bilər. Günəş allergiyasının simptomları aşağıdakı kimidir:

Qızarıqlıq

Qabarcıqlar

Qabıqlanma

Yanma hissi

Şişkinlik
Günəş allergiyası kimlərdə görülür?

Kişilərlə müqayisədə qadınlarda daha çox müşahidə edilir. Hər yaş qrupuna mənsub şəxslərdə meydana çıxa bilər. Ancaq bəzi vəziyyətlər bu allergiyanın görülmə riskini artıra bilər. Bunlar aşağıdakılardır:

Genetik faktor - Ailə üzvlərindən ən azı birində bu növ allergiya müşahidə olunarsa bu yaranma riskini artırır.

Bəzi dərmanlardan istifadə də ehtimalı artırır.

Allergiyaya səbəb yaradacaq ətir və dezinfeksiya kimi fərqli kimyəvi maddələri uzunmüddət istifadə etmək də riski çoxaldır.

Günəş allergiyasının diaqnozu necə qoyulur?

Dermatoloqlar və ya uzman mütəxəssislər tərəfindən aparılan fiziki müayinədən sonra diqnoz dəqiq qoyulur. Bu allergiya, adətən dərinin günəşə məruz qalmasından bir neçə müddət sonra ortaya çıxdığı üçün mütəxəssis tərəfindən pasiyentə suallar verilə bilər. Həmçinin şəxsin istifadə etdiyi dərmanlar, dərisinə çəkdiyi kimyəvi maddələr haqqında həkim məlumatlandırılmalıdır. Eyni zamanda həkim, bəzi analizlər tələb edə bilər.

Günəş allergiyasının müalicəsi varmı?
Müalicə nəticələrə uyğun olaraq təyin edilir. Belə şəxslər günəş işığının altında qalmaqdan qaçınmalıdır. Günəşə məruz qalan, qorunmayan və ya daha şiddətli reaksiyalar göstərən insanlar üçün mütəxəssis tərəfindən dərman və ya fitoterapiya kimi alternativ üsullar təqdim edilə bilər. Dərman müalicəsi adətən meydana gələn dəri səpkilərini minimuma endirmək, qızartı, qaşıntını aradan qaldırmaq üçün verilə bilər.

Günəş yanığı ilə günəş allergiyası eynidir?

Yanıq, dərinin günəş şüalarına uzunmüddət məruz qalması nəticəsində meydana çıxan vəziyyətdir. Günəş kremi çəkmədən və ya qorumasız uzunmüddət günəş şüaları altında duran şəxslərdə belə yanıqlar yarana bilər.

Allergiyanın yaranması üçün isə şəxsin günəş şüalarına sadəcə 1- 2 dəqiqə məruz qalması kifayət edir. Həmçinin yanıqdan fərqli olaraq dəridə qaşıntı, şişkinlik, yanma, batma kimi simptomlara yol aça bilər.