45-60 yaşlı qadınlar qaraciyər piylənməsindən belə qurtulacaq

Sonqyunqvan Universitetinin (Cənubi Koreya) alimləri müəyyən ediblər ki, postmenopauza dövrünü yaşayan qadınlara dəri vasitəsilə estrogenin yeridilməsi onların qeyri-alkoqol qaraciyər piylənməsi xəstəliyi riskini azalda bilər.
Milli.Az oxu.az-a istinadən bildirir ki, tədqiqat "Scientific Reports" jurnalında dərc olunub.
Postmenopauza dövründə olan qadınlar arasında xəstəliyin yayılması 20%-i ötür.
Qaraciyər yağlanması kimi də tanınan qeyri-alkoqol qaraciyər piylənməsi (QAQP) xəstəliyi, həddindən artıq alkoqol istehlakı ilə əlaqəli olmayan qaraciyərdə piylərin yığılması ilə xarakterizə olunur. QAQP siroz və qaraciyər xərçəngi də daxil olmaqla daha ciddi fəsadlara yol aça bilər.
Menopauza dövründən əvvəl qadınlarda menopauzadan sonrakı dövrə nisbətən QAQP-a daha az rast gəlinir. Alimlər bunun estrogenlərin qoruyucu rol oynaması səbəbindən baş verdiyini güman edirdilər.
Yeni araşdırmada həkimlər menopauza simptomlarını aradan qaldırmaq üçün hormon əvəzedici terapiya alan 45-60 yaş arasında 386 postmenopauza dövründə olan qadınların məlumatlarından istifadə ediblər. Müalicə uşaqlığı olan qadınlar üçün progestogen və estrogen, uşaqlığı götürülən qadınlar üçün isə yalnız estrogendən ibarət olub. 75 qadın hormonları dəri vasitəsilə (transdermal), 293 qadın isə peroral qaydada qəbul edib.
Nəticələr, postmenopauza dövrünü yaşayan qadınlarda QAQP-nin inkişafının və ya irəliləməsinin qarşısını almaqda estrogenin dəri vasitəsilə daxilə yeridilməsi hormonların peroral qəbulundan daha təsirli ola biləcəyini göstərdi. Dəri vasitəsilə hormon daxil edilən qrupda QAQP-nin yayılması hormonları peroral qaydada qəbul edən qrupa nisbətən əhəmiyyətli dərəcədə aşağı olub.
Bunun səbəbi estrogenin peroral qəbulundan sonra qanda triqliseridlərin (QAQP riskini artıran xüsusi yağlar) səviyyəsini artırması ola bilər. Nəticələr göstərir ki, transdermal hormon terapiyası əvvəllər QAQP olan və ya onun inkişaf riski yüksək olan postmenopauza dövrünü yaşayan qadınlar üçün daha əlverişli ola bilər.
Milli.Az