Mədə bulantısı hansı növ baş ağrısında olur? - Osteopat açıqladı

Baş ağrısı bir çox insanı narahat edən problemlərdəndir. Səbəbi müxtəlif olur.

Doktorinfo.az xəbər verir ki, osteopat Müşfiq Məmmədovun sözlərinə görə, baş ağrıları simptomatik və birincili olmaqla iki əsas qrupa bölünür. Simptomatik baş ağrısı dedikdə onun hər hansı bir xəstəliyin əlaməti kimi meydana çıxması nəzərdə tutulur. Misal üçün ümumi soyuqdəymənin əlamətlərindən biri də baş ağrısı ola bilər. Birincili baş ağrısı dedikdə isə müstəqil bir xəstəlik nəzərdə tutulur. Birincili baş ağrısına Miqreni misal göstərmək olar.

Bəs gərginlik baş ağrıları hansı nahiyədə tutur?

Məmmədov, gərginlik tip baş ağrılarının geniş yayıldığını və əksər insanda müşahidə edildiyini dilə gətirib:
"Bu zaman gicgah və ya ənsə nahiyəsində bəzən isə bütöv başda orta intensivlikdə ağrılar qeyd olunur. Ağrı 1 saatdan bir neçə günə qədər davam edə bilər. Bəzən isə ağrılarla yanaşı mədə bulantısı, işıqdan qorxma və küyə qarşı dözümsüzlük kimi şikayətlərdə narahat edir".

Həkim, miqren olduğu zaman bulantı, qusmanın ola biləcəyini, səs-küyə qarşı reaksiya olacağını qeyd edir.

"Müəyyən yaşdan sonra bir çox insanın onurğa sütununun boyun hissəsində degenerativ dəyişikliklər baş verir. Əksər hallarda məhz bu dəyişikliklər baş ağrılarının əsas səbəbi kimi görülür",-deyə osteopat vurğulayıb.

Arterial təzyiq də baş ağrılarının çox rast gəlinən hallarından olduğunu bildirib. Belə ki, təzyiqin azalması baş ağrısını yaradan səbəblərdəndir.
Bu zaman doğru müalicə üçün həkimə müraciət etmək lazımdır.